स्याङ्जाको भीरकोट नगरपालिका -६ का ९२ वर्षीय प्रेमबहादुर थापाले आफूले पाएको सामाजिक सुरक्षा भत्ता रकमले बालबालिकालाई शैक्षिक सामाग्री प्रदान गरेका छन् ।

भीरकोट नगरपालिका -६ स्थित लुब्दीखोला आधारभूत विद्यालयका १३ जना विद्यार्थीलाई थापाले शैक्षिक सामाग्री सहित लत्ताकपडा प्रदान गरेका हुन् । उनले आफ्नो सानो सहयोगबाट विद्यार्थीको मनोबल बढाउन साथै शैक्षिक विकासमा पनि योग्दान पुर्याउन पाउँदा खुसी लागेको बताए । 

उनले भने, ` मेरो सानो योगदानले पनि कसैको जीवनमा सकारात्मक परिवर्तन ल्याउन सक्छ ।´ परिवर्तनका लागि आफूले भविष्यमा पनि आवश्यक सहयोग गर्ने थापाले प्रतिबद्धता व्यक्त गरे । 

सोही अवसरमा भीरकोट नगरपालिका -६ का वडाध्यक्ष लक्ष्मण केसीले थापाको कार्यलाई उच्च सराहना गर्दै यस प्रकारका सहयोगले सामुदायिक विद्यालयको शैक्षिक वातावरणमा सुधार ल्याउने विश्वास व्यक्त गरे । उनले भने, `हामीले सामुदायिक सहभागितामा यस्ता कार्यलाई बढावा दिन आवश्यक छ ।´