स्याङ्जाको अर्जुनचौपारी गाउँपालिकाले अनुदानमा आलूको बीउ वितरण गरेको छ ।

चालू आर्थिक वर्षको प्रथम चौमासिक कार्यक्रम अनुसार पालिका क्षेत्रभित्रका आमा समूहहरुलाई ५० प्रतिशत मूल्य अनुदान र समूहको ५० प्रतिशत मूल्य सहभागितामा आलूको बीउ वितरण गरिएको हो ।

जनकदेव/कार्डीनल (रातो), MS४२ (निलो) र खुमल उज्ज्वल (सेतो) जातका करिब २०० क्वीन्टल बीउ वितरण गरिएको कृषि शाखाका प्रमुख प्रतीक अर्यालले जानकारी दिए ।

आमा समूहहरुलाई हौसला प्रदान गरी व्यावसायिकतातर्फ उन्मुख गर्न पालिकाले नै अनुदानमा बीउविजन वितरण गरेको शाखा प्रमुख अर्यालले बताए ।

पालिकाभित्रका करिब ५० आमा समूहहरु मार्फत बीउ वितरण गरिएको पालिकाले जनाएको छ । आमा समूहहरुले ५० प्रतिशत अनुदानपछि प्रतिकेजी आलूको मूल्य ४० रुपियाँ तिरेका छन् ।