स्याङ्जामा देउसी भैलो खेलेर उठेको रकम ढाडको समस्या रहेका कृष्ण परियारलाई उपचारका लागि सहयोग गरिएको छ ।

स्याङ्जाको वालिङ् नगरपालिकामा रहेको छमछमी कला केन्द्रले तिहारमा देउसी भैलो खेलेर उठेको रकम ढाड भाँचिएर बसेका वालिङ् -८ का कृष्ण परियारलाई उपचार गर्नका लागि सहयोग गरेको हो ।

ट्याक्टर दुर्घटनामा परि ढाड भाँचिएर परियारले विगत तीन वर्षदेखि पोखराको गण्डकी मेडिकल कलेजमा उपचार गर्दै आएका छन् । उनको उपचारमा केही सहयोग पुगोस् भनेर देउसी भैलोबाट उठेको पन्ध्र हजार रुपियाँ सहयोग गरेको केन्द्रकी अध्यक्ष अस्मिता रणपालले जानकारी दिइन् ।

केन्द्रले विगत चार वर्षदेखि नै देउसी भैलोबाट उठेको रकम सामाजिक कार्यमा लगाउँदै आएको रणपालले बताइन् । उनले यस अघि पनि भैलोबाट उठेको रकम पूर्व सचिव समेत रहेका भीम उपाध्यायमार्फत जाजरकोटमा भुकम्प र आगलागी पीडितलाई सहयोग पठाइएको जानकारी दिइन् ।

अस्मिताले बिरामी परियारको उपचारका लागि सहयोग गरिदिन सबैसँग आग्रह समेत गरेकी छन् ।