कालीगण्डकी गाउँपालिका छैठौं अध्यक्ष कप तथा खेलकुद महोत्सव -२०८१ को उपाधि वडा -७ ले जितेको छ ।

कालीगण्डकी गाउँपालिका -७ मिर्मी खेलमैदानमा संचालित अन्तर वडा स्तरीय अध्यक्ष कप तथा खेलकुद महोत्सवमा वडा -७ ले ६ स्वर्ण, ८ रजत र १ कास्य पदकसहित १५ पदकले उपाधि जितेको हो ।

आयोजित अध्यक्ष कप तथा खेलकुद महोत्सवमा उपविजेता वडा -४ ले ४ स्वर्ण, ४ रजत र ४ कास्य पदकसहित १२ पदक हासिल गरेको छ । तेस्रो बनेको वडा -५ ले ४ स्वर्ण, ४ रजत र २ कास्य पदकसहित १० पदक प्राप्त गरेको छ ।

गाउँपालिकाले खेलकुदको विकास तथा प्रवर्धन गर्ने उद्देश्यले हरेक वर्ष जस्तै यस वर्ष पनि महोत्सवको आयोजना गरेको हो । शुक्रबारदेखि संचालित छैठौं अध्यक्ष कप तथा खेलकुद महोत्सवमा महिला/पुरुष फुटबल, भलिबल, क्रिकेट, ब्याडमिन्टन(एकल तथा डबल), टेबल टेनिस(एकल तथा डबल), दौड, बुद्धिचाल खेल भएका थिए ।

सात खेल २२ विधामा प्रतिस्पर्धा भएको खेल महोत्सवमा कालीगण्डकी गाउँपालिकाका प्रत्येक वडाबाट ९८ जनाको दरले झण्डै ७०० जना खेलाडीको सहभागिता रहेको पालिका अध्यक्ष खिम बहादुर थापाले बताए ।

विगत सात वर्षदेखि प्रतियोगिता भइरहेको अध्यक्ष कप तथा कालीगण्डकी खेलकुद महोत्सव -२०८१ मा २२ स्वर्ण, २२ रजत र २२ कास्य पदकका लागि  प्रतिस्पर्धा भएको थियो ।

प्रतियोगिताका विजेता तथा उपविजेतालाई गण्डकी प्रदेश सामाजिक विकास तथा खेलकुद मन्त्री विन्दु कुमार थापाले पुरस्कार वितरण गरेका थिए ।