स्याङ्जाको भीरकोट नगरपालिका -१ भलुवाडाँडामा आगोलागि हुँदा लाखौंको क्षति भएको छ भने एक जना घाइते भएका छन् ।

बिहिबार साँझ बिद्युत सर्ट भई स्थानीय ८१ वर्षीय बेल नारायण श्रेष्ठको ढुङ्गा माटोले बनेको जस्ताले छाएको दुई तले कच्ची घर र एक तले कच्ची गोठमा आगोलागि भएको जिल्ला प्रहरी कार्यालय स्याङ्जाका प्रहरी निरीक्षक उमेशलाल श्रेष्ठले जानकारी दिए । गोठबाट आगो सुरू भएको श्रेष्ठले बताए । 

आगोलागि हुँदा दुई तले कच्ची घर र एक तले कच्ची गोठ जली पूर्ण रुपमा नष्ट भएको, घरमा रहेको अन्दाजी एक लाख तिस हजार रुपियाँ नगद, अन्दाजी सात तोला सुन, भाँडा बर्तन , लत्ता कपडा गरी अन्दाजी पन्ध्र लाख क्षति भएको निरीक्षक श्रेष्ठले बताए । 

आगो निभाउने क्रममा स्थानीय ५० वर्षीय कोट बहादुर मगरको टाउकोमा चोट लागेर घाइते भएका थिए । घाइते मगर उपचार पश्चात् डिस्चार्ज भएको प्रहरी निरीक्षक उमेशलाल श्रेष्ठले जानकारी दिए ।