पुतलीबजार नगरपालिका -७ बाच्पुरमा भएको प्रथम स्वर्गीय कमल पोख्रेल स्मृति कप पुरुष भलिबल प्रतियोगिताको उपाधि मोहोरियाले जितेको छ । 

'स्वास्थ्यका लागि खेलकुद, राष्ट्रका लागि खेलकुद' भन्ने मूल नाराका साथ साहारा युवा क्लबले आयोजना गरेको साविक वडा स्तरीय पुरुष भलिबल प्रतियोगितामा मोहोरिया युवा क्लब प्रथम, साहारा युवा क्लब द्वितीय र जनप्रिय युवा क्लब तृतीय भएको क्लबका सचिव प्रेम बहादुर थापा (सिजन)ले जानकारी दिए ।

मोहोरिया युवा क्लबले २-० को सोझो सेटमा साहारा युवा क्लबलाई पराजित गर्दै प्रथम भएको हो । प्रथम भएसङ्गै मोहिरियाले ६० हजार एक सय पाँच रुपियाँ नगदसहित ट्रफी, मेडल र प्रमाणपत्र हात पारेको हो । द्वितीय आयोजक क्लबको पहिलो समूहले ट्रफी, मेडल र प्रमाणपत्रसहित ४० हजार एक सय पाँच रुपियाँ प्राप्त गरेको हो । 

त्यस्तै, प्रतियोगितामा जनप्रिय युवा क्लब तृतीय भएको हो । तृतीय भएको जनप्रियले २० हजार एक सय पाँच रुपियाँ नगदसहित ट्रफी, मेडल र प्रमाणपत्र हात पारेको हो । 

प्रतियोगितामा विधागततर्फ उत्कृष्ट खेलाडी सन्दीप ठकुरी, स्पाइकर जीत बहादुर केसी(अमृत), सेटर सागर थापा, ब्लकर सुजन पौडेल र डिफेन्डर अनिश कार्कीका साथमा प्रतियोगिताका उदयमान खेलाडी मिलन परियारलाई ट्रफी र प्रमाणपत्रसहित पुरस्कृत गरिएको खेल संयोजक अमृत केसीले बताए ।

पौष १२ गतेदेखि संचालित भलिबल प्रतियोगितामा १२ समूहको सहभागिता रहेको थियो ।