स्याङ्जाको अर्जुनचौपारी गाउँपालिकाको नि:शुल्क स्वास्थ्य हेल्थ डेस्कबाट ५४ जना लाभान्वित भएका छन् । 

अर्जुनचौपारी गाउँपालिका -१ स्थित पञ्चकन्या माध्यमिक विद्यालयको ५० औं वार्षिकोत्सब तथा स्वर्ण महोत्सवको समारोहमा पालिकाले हेल्थ डेस्क सञ्चालन गरेको थियो । बुधबार संचालित उक्त हेल्थ डेस्कबाट समारोहमा उपस्थित ५४ जनाले सेवा लिएका छन् । सेवा लिनेमध्येका धेरैमा प्रेसर र रुघाखोकीको समस्या देखिएको थियो भने केहीले सामान्य चेकजाँच गरेका थिए । 

यस गाउँपालिकाले स्वास्थ्य सेवामा सबैको पहुँच पुर्याउने उद्देश्यका साथ पालिकाभित्र हुने हरेक सभा गोष्ठी कार्यक्रमहरुमा हेल्थ डेस्क राखेर सेवा प्रवाह गर्दै आएको छ । 

'नागरिकलाई टेवा, टोल टोलमा स्वस्थ्य सेवा' भन्ने कुरालाई आत्मसात गर्दै गाउँपालिकाले यस्ता कार्यक्रमहरु गर्दै आइरहेको अर्जुनचौपारी गाँउपालिकाका उपाध्यक्ष सपना गुरुङले बताइन् ।