भीरकोट नगरपालिका -१ बयरघारी स्थित भीरकोट खेलमैदान नजिकै भुसाल इन्टरप्राइजेज प्रालिको नाममा रहेको क्रसरमा लगाइएको शिलबन्दी खुलाइएको छ ।
गत १ असारमा जिल्ला प्रशासन कार्यालय स्याङ्जाले उक्त क्रसर शिलबन्दी गरेको थियो । भुसाल इन्टरप्राइजेजको नाममा दर्ता भएतापनी क्रसर सम्बन्धी कार्यमा अनुमती नलिएको/दर्ता नभएको पाइएको भन्दै गत असार महिनामा क्रसरलाई शिलबन्दी गरिएको थियो ।
शुक्रबार मात्रै क्रसरमा लगाइएको शिलबन्दी खुलाइएको छ । भीरकोटमा संचालित शहरी विकास मन्त्रालयको एक आयोजनाका लागि भनेर २० महिनासम्म निर्माण सामाग्री उपलब्ध गराउने गरि अस्थायी अनुमती दिँदै शिलबन्दी खुलाइएको सहायक प्रजिअ दीपक पौडेलले जानकारी दिए ।
संघीय शहरी विकास तथा भवन विकास कार्यालय पोखराको गत असार ६ गते सम्झौता भएको योजनाको लागि निर्माण सामाग्री आवश्यक भएकोले इन्जिनियर अच्युत पौडेलले सहजीकरणको लागि यहि पुस ४ गते नगरपालिकालाई सिफारिस गरेका थिए । योजनाको लागि दुई हजार ३०५ घनमिटर ढुङ्गाको काम, १४१ घनमिटर आरसीसी काम, दुई हजार ४३ घनमिटर बेस र तीन हजार १८० घनमिटर सब बेसको लागि सामाग्री आवश्यक रहेको इन्जिनियर पौडेलले बताए ।
सोही पत्रको आधारमा प्रशासन र नगरपालिकाले उक्त क्रसरलाई २० महिनाको लागि मात्र अस्थायी अनुमती दिएर शिलबन्दी खुलाइएको सहायक प्रजिअ पौडेलले बताए । सहायक प्रजिअ पौडेलले यदि क्रसरबाट ठेक्काको कामबाहेक अन्यत्र ठाउँमा सामाग्री बिक्रीवितरण गरेको पाइएमा फेरि शिलबन्दी र कारबाही गरिने बताए ।
