स्याङ्जाको वालिङ् नगरपालिका – ६ माझकोटमा विङ्गर भ्यान दुर्घटना भएको छ । दुर्घटनामा परी एक जना महिलाको घटनास्थलमै मृत्यु भएको छ भने चालक घाइते भएका छन् ।

मृत्यु हुनेमा वालिङ् नगरपालिका – ७ हिलापानी बस्ने ४८ वर्षीया दिलसरा आले रहेकी छन् । भ्यानमा सवार आले दुर्घटनास्थलमा नै मृत भेटिएको जिल्ला प्रहरी कार्यालय स्याङ्जाका प्रहरी निरीक्षक प्रवेश तिवारीले बताए ।

त्यस्तै, दुर्घटना पश्चात् फरार रहेका चालक २८ वर्षीय सुरज थापा घाइते अवस्थामा फेला परेकोमा प्राथमिक स्वास्थ्य केन्द्र वालिङ्मा सामान्य उपचारपछि थप उपचारका लागि पोखरा रिफर गरिएको तिवारीले जानकारी दिए ।

आइतबार सबेरै करिब ३ बजे वालिङ् – चापाकोट भित्री सडकखण्डमा ग १ ज ७५११ नम्बरको विङ्गर भ्यान सडकबाट करिब १५० मिटर तल खस्दा दुर्घटना भएको तिवारीले जानकारी दिए । दुर्घटनाको कारण भने खुलेको छैन ।