स्याङ्जाको चापाकोट नगरपालिकामा सकेट बम विष्फोट हुँदा ४५ वर्षीय पूर्वसैनिक गोविन्द पुरी घाइते भएका छन् । 

शनिबार दिउँसो घरको सामान ओसारपसार गर्ने क्रममा बम विष्फोट हुँदा चापाकोट -४ मल्याङ्कोट पुरीगाउँका पूर्वसैनिक पुरी आँखा, खुट्टा लगायत शरीरका विभिन्न ठाउँमा बमको छर्रा लाग्दा घाइते भएका हुन् । 

घाइते पुरीको पाल्पा स्थित लुम्बिनी मेडिकल कलेज प्रभासमा उपचार भइरहेको जिल्ला प्रहरी कार्यालय स्याङ्जाका प्रवक्ता एवं सूचना अधिकारी प्रहरी नायब उपरीक्षक हरिप्रसाद पौडेलले जानकारी दिए । 

दुई वर्ष अगाडि अवकाश लिएका पूर्व नेपाली सैनिक पुरीको घरमा बम कसरी रहेको भन्ने कुरा खुलिनसकेको प्रहरीले बताएको छ । घटनाको भने पुरी स्वयंले प्रहरीलाई खबर गरेका थिए । 

प्रहरीले घाइते पुरीको अवस्था सामान्य रहेको जनाएको छ भने बम विष्फोट हुँदा घाइते पुरीको कच्ची घरमा समेत क्षति पुगेको छ ।