स्याङ्जाको चापाकोट नगरपालिकामा शनिबार दिउँसो घरको सामान ओसारपसार गर्ने क्रममा भएको बम विष्फोटमा घाइते पूर्वसैनिक गोविन्द पुरी पक्राउ परेका छन् । 

स्थलगत अनुसन्धानका लागि गएको नेपाली सेनासहितको प्रहरी टोलीले पुरीको घरमा बम बनाउने सामाग्री सहित गोलि फेला पारेकोले उनलाई पक्राउ गरिएको जिल्ला प्रहरी कार्यालय स्याङ्जाका प्रवक्ता एवं सूचना अधिकारी प्रहरी नायब उपरीक्षक हरिप्रसाद पौडेलले जानकारी दिए ।

घटनास्थलमा पुगिसकेपछी प्रहरीले ९०० ग्राम High Explosive PEK, १.५ मिटरका दुई थान डेटकड, ७.६२ mm को एक थान जङ्गी राउन्ड र दुई थान गोलिका खोका लगायतका  सामाग्री बरामद भएकोले पुरीलाई नियन्त्रणमा लिई थप अनुसन्धान अगाडि बढाइएको डिएसपी पौडेलले बताए । 

दुई वर्ष अगाडि अवकाशप्राप्त चापाकोट -४ मल्याङ्कोट पुरीगाउँका पूर्व नेपाली सैनिक ४५ वर्षीय गोविन्द पुरी शनिबार दिउँसो बम विष्फोट हुँदा बमको छर्रा लाग्दा घाइते भएका थिए । 

घाइते पुरी पाल्पा स्थित लुम्बिनी मेडिकल कलेज प्रभासमा उपचार पश्चात् घर फर्किसकेका थिए । बम विष्फोट हुँदा घाइते पुरीको कच्ची घरमा समेत क्षति पुगेको छ ।