स्याङ्जा पछिल्लो क्रममा महिला क्रिकेटमा अन्तर्राष्ट्रिय खेलाडी उत्पादनको केन्द्र बन्दै गएको छ। पटक पटकका यहाँका खेलाडी सहभागी टिमले खेलमा जित्दै आएकोमा यस पटक उनै खेलाडी युएईमा हुने आईसीसी अण्डर -१९ महिला विश्वकप छनोटमा परेका हुन् ।
कात्तिक १९ गतेबाट २९ सम्म हुने प्रतियोगितामा क्यानको छनोटमा स्याङ्जाका कुसुम गोदार, सिमाना केसी, ज्योत्सनिका मरासिनी छनोट हुन सफल भएका छन् । उनीहरुलाई नेपाल क्रिकेट संघ (क्यान) ले छनोट गरेको हो ।
१४ खेलाडी छनोट भएकोमा गण्डकीका चारजना छनोट हुँदा स्याङ्जाका तीन जना परेका हुन् । नेपाल, यूएई, कुवेत र थाइल्यान्डको सहभागिता रहने प्रतियोगितामा कास्कीकी रचना चौधरी गण्डकी प्रदेशबाट छनोट हुने अर्को खेलाडी हुन् ।
यसअघि सन् २०२२ आईसीसी अण्डर -१९ महिला वर्ल्डकप एसिया क्वालिफायरमा नेपालको महिला टिममा अन्तिम छनोटमा परेका ज्योत्सनिका मरासिनी र निरु जिटी आईसीसीको मापदण्डका अनुसार १५ वर्षभन्दा उमेर कम भएकाले राष्ट्रिय टिमबाट बाहिरिनु परेको स्याङ्जा क्रिकेट संघका अध्यक्ष दिवाकर थापाले बताए ।
अन्तर्राष्ट्रिय खेलाडीहरुको उर्भरभूमि रहेको स्याङ्जामा क्रिकेट संघले 'क्रिकेट खेलबाट महिला सशक्तीकरण' र 'स्कूल टू वर्ल्ड कप' भन्ने मूल नाराका साथ २०७६ साल देखि पुरुषमात्र नभई महिला क्रिकेट विकासका लागि निरन्तर काम गर्दै आइरहेको छ । यहाँका महिला खेलाडीहरु गण्डकी प्रदेशको अण्डर -१९ तथा सिनियर महिला क्रिकेट टिममा १४ जना खेलाडीमा १० जना स्याङ्जा जिल्लाका खेलाडीहरु गण्डकी प्रदेशको प्रतिनिधित्व गरिरहेका छन् ।
२०७८ सालमा धनगडीमा आयोजित अण्डर -१९ सुदुरपश्चिम मुख्यमन्त्री कप महिला राष्ट्रिय क्रिकेट प्रतियोगिता २०८० मा विजेता र २०८० माघ १२ गते देखि १९ गते सम्म चितवनमा आयोजित 'मैयादेवी स्मृति अण्डर -१९ राष्ट्रिय क्रिकेट प्रतियोगिता'मा उपविजेता भएको हो। यस्तै राष्ट्रियस्तरको प्रतियोगितामा उत्कृष्ट प्रदर्शन गरेका यहाँका खेलाडीले स्याङ्जा तथा गण्डकी प्रदेशको नाम एक बलियो प्रतिद्वन्दीको रुपमा परिचित गराइसकेका छन् ।
गण्डकी प्रदेश अण्डर-१९ तथा सिनियर महिला क्रिकेट टिममा चार वर्षबाट महिला क्रिकेटका अधिकांश खेलाडीहरु यहाँका खेलाडी प्रतिनिधित्व गर्दै आएका छन् । कमजोर आर्थिक अवस्थाका कारण क्रिकेट प्रशिक्षण र खेल्नका लागि आवश्यक सामाग्रीहरु जुटाउन निकै नै संघर्ष गर्नुपरेको र हालसम्म खेलाडीहरुलाई प्रशिक्षण तयारीका लागि कुनै पनि सरकारी निकायबाट प्रशिक्षण स्थल र क्रिकेट खेलमैदान निर्माणमा सहयोग नभएको थापाले बताए ।
