स्याङ्जाको पुतलीबजार नगरपालिका -७ ठुलाडिहीमा आयोजित चौँथो ठुलाडिही कपको उपाधी पुतलीबजारले जितेको छ ।

ठुलाडिही रि-युनाईटेड क्लब ठुलाडिहीद्वारा आयोजित वडा स्तरीय पुरुष भलिबल प्रतियोगितामा पहिलो सेट गुमाएको पुतलीबजार नगरपालिका -७ ठुलाडिहीले तनहुँको शुक्लागण्डकी नगरपालिका -१२ लाई ३-१ को सेटमा १८-२५, २५-१८, २५-१५ र २५-११ अङ्कले पराजित गर्दै उपाधि जितेको हो।

उपाधि जितेसङ्गै पुतलीबजारले एक लाख नगदसहित ट्रफी, मेडल र प्रमाणपत्र हात पारेको हो। उपविजेता शुक्लागण्डकीले भने ट्रफी, मेडल र प्रमाणपत्रसहित ५० हजार रुपियाँमा चित्त बुझाएको हो।

ठुलाडिही खेलमैदानमा भएको उक्त प्रतियोगितामा पुतलीबजार न.पा. -१२ पेल्काचौरले पुतलीबजार न.पा. -५ पौवेगौंडेलाई ३-० को सोझो सेटमा पराजित गर्दै तृतीय भएको खेल संयोजक उत्तम थापाले जानकारी दिए ।

पेल्काचौरले पौवेगौंडेलाई २५-१३, २५-२०, र २५-२२ अङ्कले पराजीत गरेको हो। प्रतियोगितामा तृतीय भएको पेल्काचौरले २५ हजार नगदसहित ट्रफी, मेडल र प्रमाणपत्र पाएको हो ।

`हाम्रो गौरव, हाम्रो सान, हाम्रो ठुलाडिही´,`स्वास्थ्यको लागि खेलकुद राष्ट्रको लागि खेलकुद´ भन्ने मूल नारालाई आत्मसात गर्दै कार्तिक ५ गतेदेखि ठुलाडिही बहुउद्देश्यीय खेलमैदानमा प्रतियोगिता शुरु भएको थियो ।